المقامه القثـائيه

وقالوا بلدنا مصر جميله ومن الفراعنه هيه سليله وحكاياتها ولا ألف ليله وليله وعشان كده هحكيلكو حدوته تقولو حلوه تقولو ملتوته أهو في النهايه هنقول توته توته ومن هنا نبتدي الحدوته صحيت الصبح ألبس البدله وعدلتها ميت عدله وحطيت الجل والهيئه بقت كامله

وبقيت أخر انضباط بكلونيا تحت الباط وخدت الموبايل والمفتاح وأنا آخر انشكاح ونزلت على عبد الفتاح ألسع سندوتشين علشان أرتاح وطلعت على عم مفتاح اشرب الحاجه الساقعه وهي تبقى روحه ولا رجعه وضربت التكريع المتين اللي يسمع الميتين وقلت ابدأ مشواري منين ؟! أصل امبارح في شركة كلمتني قالولي عندك مقابله ولازم تيجي بالبدله عشان تقابل المدير قلت يا سلااام معقوله الدنيا لسه بخير من غير واسطه ولا محسوبيه تكلمني شركة التقليه للمواد الغذائيه اشتغل فيها بماهيه وأبقى من جملة الأفنديه وسجدت لربنا شكر وبست إيدي وش وضهر وقلت مين اللي قال ينضرب على البطن اللي مالوهش ضهر

المهم .. طلعت على المحطه ووقفت الميكروباص والسواق يببتسملي باين عليه بصباص والكل من حوالَيه يضحكوا لِيه والراجل التباع بينطط زي الوليه ومشينا بكل سعاده والكل سكر زياده والناس من حواليه حلوه وكأن ملهومش ولا بلوه وقربت على شركة التقليه وقلت أنا هبقى ميه ميه وابتسمت في سعادة وطلعلي الراجل من ورا البوابه وقاللي انت مين يابن الكدابه قلت له بعزم شديد وقوه حديد انا الموظف الجديد رد بصوت مرير:جديد .. دا شيء خطير وقبلك قالوها كتير قلتله أنا عندي مقابله مع الست رضوه عشان أكل العجوه وبعديها يجيني الخبر وأقابل المديره سمر دخلت على الست رضوة وقابلتني بكل تقوى وقالت عرفني بنفسك ولا تحب تشرب قهوة رديت بكل فخر أنا محمد نصر وقاعد هنا من الفجر لحد العصرعشان أقابل السعاده وأشرب قهوه سكر زياده بصتلي من فوق لتحت وقالتلي أوعى الفحت  لتقع تحت من غير ماتجيبلي في سيرتك ياللا وريني كارتك قلتلها كارت إيه؟ وعشان إيه ؟وكل دا ليه؟ ردت في برود : أمال هعينك من غير كروت أنت باين عليك مش مظبوط.

وطلعت من شنطتها كروت من هنا لأسيوط اشي لمعالي الباشا واشي لبتاع البغاشا واشي للرقاصه كشكاشه وقالتلي شايف ولا انت خايف لازم تديني كارت بتاع أي حد أو حتى سبت كان معايا كارت مبلول للحاج سلامه بهلول الراجل بتاع الفول وبكل قوه أديته لرضوة

قالتلي ماشي .. كده تمام ياللا بقى سلام وهنتصل بيك لما يجيلنا التمام وطلعت بره وأنا كلي حسره وشفت الواد الحليوه داخل القوضه اللي جوه وقابلِتُه الست رضوه .

وحضنته بكل قوه وقالتله : سلامه إزيك وازي ماما وقفلت الباب وراها هي واللي قاعد معاها ونزلت تاني من الدور التاني على الأولاني وطلعت لبوابه وطلعلي عم حمامه وقاللي وهو لسنانه بينضف أزيك يا موظف قلتلك أنت جاي تخرف مشيت وأنا مش شايف ومن كل حاجه خايف حتى الاكل ناشف وركبت الميكروباص مع الراجل البصباص والناس قاعده مكشره

الكل اتحول في دقيقه الظاهر هيادي الحقيقه وعدينا ع الكورنيش وشفت بتاع الورنيش وشفت الست محروسه قاعده وشايله الكوسه وجاتلي فكره ملحوسه انما تستاهل بوسه

لو نهر النيل دا صلصه هيكفي كوسة محروسه ؟!!!!!